milevski

39 СВЕТСКА МАКЕДОНСКА СРЕДБА ТРНОВО 2010
ГОВОРОТ НА ТОДОР ПЕТРОВ (Претседател на Светскиот Македонски Конгрес) НА ИЛИНДЕН ВО ТРНОВО

2 август 2010 година, Битола, Македонија (СМК) – Повеќе од 10.000 Македонци од сите делови на Македонија и од целиот свет, националниот празник ИЛИНДЕН – Денот на македонската државност традиционално го одбележаа на Триесет и деветтата Светска Македонска Средба во потпелистерското село Трново, во македонската црква „Успение на Пресвета Богородица“. После утринската богослужба, парохискиот свештеник протоереј Стефан богослужи панихида за помен на сите упокоени, загинати и убиени знајни и незнајни јунаци и борци за слободата на Македонија.

Ви го пренесуваме во целост говорот на претседателот на Светскиот Македонски Конгрес Тодор Петров: „Почитуван отец Стефан, Почитуван господинe Наумовски, Почитуван господинe Талевски, Почитувани браќа и сестри Македонци и Македонки, од Австралија, Јужна Америка, САД, Канада, Африка, Азија и Европа, за многу години трите Илиндена: Херонеја, Крушево и Свети Отец Прохор Пчињски! Напомош, Свети Пророк Илија!

Бидејќи повторувањето е мајка на знаењето, како што секојдневно разни мешетари со злоупотреба на медиумите и партиите не’ тероризираат за промена на државното име Македонија, грев ќе е пред Господа, ако и ние на овој свет ден не’ кажеме: Нашата држава се вика Македонија, ние сме Македонци, нашиот јазик е македонски, нашата света црква е Македонска затоа што е Првославна, оти први сме го прославиле Господ Бог Исус Христ во Европа. Па отпосле сме ги описмениле и покрстиле останатите во Европа. Така било, така и ќе остане! Чест и на браќата муслимани по крв Македонци!

Прашањето за државното име, за оние со плиток ум, е затворено со референдумот од 8 септември 1991 година, кога македонскиот народ и граѓаните, во апсолутно мнозинство гласаа за „самостојна и суверена држава Македонија“ без додавки и придавки! Одлуката на референдум по Устав е задолжителна. Затоа, никој нема мандат да разговара, преговара и договара промена на државното име Македонија! Само им се лаже умот на потплатените за да ги оправдат парите за предавството на името. Бедни врховисти и квислинзи!

Но, ним и пред целиот свет: оваа земја била, е и ќе остане само Македонија! Никој нема нејзиното име да го смени! Верувајте во себеси и во Господа! А, на нашиот јужен сосед Грција им упатуваме една порака: Доколку Атина не ја признае Македонија, Елада нема да остане цела! Банкротот во кој вплови сега, ќе ја проголта старата дама, затоа што ариевскиот фашистички модел на еднородна и едноверна нација конечно ќе го снема! А, кога тоа ќе се случи, ќе остане она што до 1821 година било: Во Грција повторно ќе има се’, само Грци не’! Пред 1821, Грција – ни по историја, ни по географија, ни по етнологија, ни по археологија – нема! И покрај се, ние повторно им велиме, нека Ви е провинцијата Македонија. Но, Атина не сака да постои државата Македонија, затоа што името на државата е од Македонците, нив во цел свет со промената на државното име да ги снема!

Деновиве, во Скопје, преубав е споменикот на гемиџиите, до Даме и Гоце за кои воопшто и не е битно дали некогаш можеби за нешто се скарале или не се скарале, луѓе од крв и месо! Но, заради историското паметење, гемиџиите не биле Индијанци, туку Македонци, а крвта вода не бива! Нашиот народ има и самопочит, и гордост, и достоинство, го негува и го чува своето, памети, но знае и да врати!

Македонците се против нов референдум за промена на државното име Македонија, Македонците се против ратификација на договор за промена на државното име во Собранието на Македонија, Македонците бараат итен и безусловен прекин на разговорите за промена на државното име Македонија. Македонците го осудуваат наци-фашизмот на Атина и апартхејдот на европската бирократија према Македонија. Македонците бараат Атина, Брисел и Стразбур да се извинат за геноцидот врз македонскиот народ и да платат репарации за штетите од окупацијата и геноцидот: некои експерти велат најмалку 20.000 милијарди евра за експлоатација на природните ресурси во окупираните територии, воените штети и штетите врз имотите на насилно прогонетите Македонци од Егејскиот дел на Македонија од Балканските војни до денес.

Во западните демократии за одавање на државна тајна судат за кривично дело – предавство, продавањето на државното име не се нарекува никако поинаку, освен со велепредавство како кривично дело од највисок степен!

Поради тоа, на домашните врховисти и квислинзи им порачуваме да не заборават, дека предавството не е демократија, туку кривично дело! Промената на државното име Македонија не е право и слобода на мисла и говор, барањето за промена на државното име Македонија е велепредавство, геноцид врз македонскиот народ и злосторство против човештвото што не застарува! Оттука и предупредувањето: домашните врховисти и квислинзи да не заборават, дека ним судот на историјата и судот на народот, кога и да е, ќе им судат и пресудат. Барем ги научивме, бидејќи самите се обележаа и со име и презиме! Самите си ги покажаа роговите! Колку се погласни, колку повеќе ги злоупотребуваат медиумите и партиите за да го трујат народот и граѓаните, поблиску се до крајот!

Барањето на Атина и притисокот од европската бирократија за промена на името на Македонија како самостојна и суверена држава претставува срам за Европската Унија и НАТО!

Не го злоупотребуваме присуството на министерот за евро-интеграции, оти нашиот говор не е негов. Македонците можеби се за пристапување во сојуз со Европската Унија и НАТО, но како еднакви со еднаквите, како рамноправни меѓу рамноправните.

Доколку антимакедонизмот на Атина, грчкиот геноцид врз македонскиот народ и барањето за промена на државното име Македонија се вредност за солидарност на Брисел и Стразбур со Грција, Македонците го отфрлаат членството во овие сојузи на држави.

Единствениот компромис со Атина за државното име Македонија е ирската формула која ни ја препорача и евро-амбасадорот во Македонија – „Република Ирска“ и “Северна Ирска како дел од Обединетото Кралство Велика Британија“, соодветно – уставната референца „Република“ пред државното име Македонија и „провинција Јужна Македонија како дел од Република Грција“, како трајно решение на македонското прашање!

Ги поттикнуваме владите во Скопје и Атина на трајно македонско-грчко помирување и Договор за траен мир и добрососедство меѓу Македонија и Грција што ќе ја замени времената согласност од 13 септември 1995 година.

После овој убав ден, како и секој ден по тоа, на легнување, бидете спокојни и со мирен сон, затоа што верувајте, нема човек што ќе го смени името на нашата држава Македонија. Со љубовта за Македонија ќе ги победиме силите на злото против Македонците, а со мирот светот ќе го обединиме. И аман, престанете да ги тероризирате Македонците со промена на државното име Македонија. Тој ќеиф нема кој да Ви го оствари!

Нека Господ Бог ги благослови Македонците по род и државјанство, каде и да се, на сите меридијани на земјината топка! Да живее, Македонија!“ – рече на крајот од својот говор претседателот на СМК Тодор Петров.